Væntanlegt rit um skattalækkanir og velferð

Hinn 1. október 2008 mun Háskólaútgáfan gefa út fyrir Félagsvísindastofnun nýtt fræðirit um skattamál og velferð, þar sem eru erindi nokkurra erlendra og innlendra fræðimanna, er þeir hafa haldið í Reykjavík um skattalækkanir, sem farið geti saman við rausnarlega, en markvissa velferðaraðstoð.

Skattalækkanir án þess að fórna velferð

Prófessor Gary S. Becker (Chicago og Stanford) skrifar um hlutskipti og tækifæri lítilla opinna hagkerfi við hnattvæðingu. Prófessor Arthur Laffer skrifar um skattalækkanir, sem hafa ekki í för með sér lægri skatttekjur ríkisins, heldur jafnvel hærri. Prófessor Richard Teather skrifar um skattasamkeppni milli þjóða og möguleika Íslands í því sambandi. Prófessor Hannes H. Gissurarson skrifar um, hvert íslenska leiðin liggur inn í framtíðina og hugsanlega þjóðarsátt um auknar bætur handa bágstöddum, en lægri skatta á alla aðra. Prófessor Ragnar Árnason skrifar um tekjudreifingu og skatta. Dr. Guðný Eydal dósent skrifar um velferðarþjónustu á Íslandi, sérkenni hennar og kosti í samanburði við velferðarþjónustu á Norðurlöndum. Prófessor Gylfi Zoëga skrifar um tengsl skattlagningar og löngunar fólks og getu til að vinna. Gera má ráð fyrir fleiri höfundum í bókinni.

Ritstjórar bókarinnar eru prófessor Hannes H. Gissurarson og dr. Tryggvi Þór Herbertsson.

Háskólaútgáfan gefur bókina út fyrir Félagsvísindastofnun. Útgáfutími: 1. október 2008 (setningardagur Alþingis).

Höfundar

Gary S. Becker er 77 ára að aldri. Hann er prófessor í hagfræði og félagsfræði í Háskólanum í Chicago og rannsóknarfélagi í Hoover-stofnuninni í Stanford-háskóla. Hann hlaut Nóbelsverðlaunin í hagfræði 1992 fyrir að hafa víkkað út landamæri hagfræðinnar, en hann hefur greint mörg félagsleg fyrirbæri hagfræðilega.

Ragnar Árnason er 58 ára að aldri. Hann lauk doktorsprófi í hagfræði frá Háskólanum í Bresku Kólumbíu í Vancouver. Hann er prófessor í fiskihagfræði, sérfræðingur Alþjóðabankans í fiskveiðistjórnun og ráðgjafi ríkisstjórna um allan heim. Hann hefur gefið út fjölda rita um fiskihagfræði og önnur svið hagfræðinnar.

Guðný Björk Eydal er 45 ára að aldri. Hún lauk doktorsprófi í félagsfræði frá Háskólanum í Gautaborg 2005. Hún er dósent í félagsráðgjöf í Háskóla Íslands. Hún hefur skrifað ýmsar greinar í fræðirit og er einn þátttakenda í norrænu rannsóknarverkefni um framtíð velferðarríkisins.

Hannes H. Gissurarson er 58 ára að aldri. Hann er prófessor í stjórnmálafræði í Háskóla Íslands og situr í bankaráði Seðlabanka Íslands. Eftir hann er væntanleg á næstunni bók um hagkerfisbreytinguna á Íslandi 1991-2007.

Tryggvi Þór Herbertsson er 44 ára að aldri. Hann lauk doktorsprófi í hagfræði frá Háskólanum í Árósum og var forstöðumaður Hagfræðistofnunar Háskóla Íslands, þangað til hann gerðist 2007 bankastjóri Askar fjárfestingabanka.

Arthur B. Laffer er 67 ára að aldri. Hann lauk prófum frá háskólunum í Yale og Stanford og kenndi hagfræði í Stanford, Chicago-háskóla og víðar. Hann hefur verið ráðgjafi Bandaríkjaforseta og tekið þátt í prófkjöri Repúblikana vegna kosninga til öldungadeildar Bandaríkjaþings. Hann situr í stjórnum fjölmargra fyrirtækja og rekur eigið ráðgjafarfyrirtæki. Hann hefur skrifað fjölda rita um efnahagsmál.

Richard Teather lauk prófi frá Oxford-háskóla og kennir skattamál í Bournemouth-háskóla, auk þess sem hann sinnir skattaráðgjöf fyrir einkafyrirtæki. Hann gaf nýlega út bókina The Benefits of Tax Competition.

Gylfi Zoëga er 43 ára að aldri. Hann lauk doktorsprófi í hagfræði frá Columbia-háskóla í New York, þar sem hann starfaði með Nóbelsverðlaunahafanum Edmund Phelps. Hann er prófessor í þjóðhagfræði í Viðskipta- og hagfræðideild Háskóla Íslands og hefur birt fjölda ritgerða í fræðilegum tímaritum erlendis, svo sem American Economic Review.

Frekari upplýsingar veitir Dr. Hannes Hólmsteinn Gissurarsson [hannesgi hjá hi.is]